غَزَلَ نَمبَرُ 3

”ضَرُورَتِ حُسَيۡنَ ؑ جِيۡ“

دُنۡيَا کيۡ اَڄُ بِه آهِ، ضَرُورَتِ حُسَيۡنَؑ جِيۡ،
ڪَرِ پيۡرِوِيۡ ڪَا پوُرِيۡ، تُونۡ سِيۡرَتَ حُسَيۡنَؑ جِيۡ.
توۡحِيۡدَ، حَجُّ روۡزي، ۽ صَلۡوٰتَ تيۡ مُقِيۡمَ،
آخِرۡ نَمَازَ ۾ بِه هُئِيۡ، دَعۡوَتَ حُسَيۡنَؑ جِيۡ.
توۡحِيۡدَ جِيۡ اَمَانَتَ، سِيۡنِيۡ ۾ هُئي سَدَا،
سِيۡرَتَ حُسَيۡنؑ جِيۡ رَکُه، صُورَتَ حُسَيۡنَؑ جِيۡ.
توۡحِيۡدَ جِيۡ ڇَڏيۡ ٿِئينۡ، تارِڪُ نِمَازَ جوۡ،
ڄَاڻَجِ ته دِلِ ۾ تُنۡهِنۡجِيۡ، خُصُومَتَ حُسَيۡنَؑ جِيۡ.
غَازِيۡ حُسيۡنُؑ هو ۽ نِمَازِيۡ، حُسَيۡنُؑ هو،
توۡکيۡ رَکَڻُ کَپيۡ ٿِيۡ، مَرُوَّتَ حُسَيۡنَؑ جِيۡ.
پِئوۡ پَاڻَ کيۡ سَڏَائِيۡن، مُحۡبِّ اِمَامِ سُومُ،
پوءِ ڇو؟ رَکِيۡن تُونۡ دِلِ ۾، ڪُدُورَتَ حُسَيۡنَؑ جِيۡ.
پَهۡرِيۡن ڪَئِيۡ جَانۡ نِثَارُ، مُحۡبَّنِ حُسَيۡنَؑ جي،
اَهۡڙِيۡءَ طَرَحَ سَانۡ، آهيۡ حُڪُومَتَ حُسَيۡنَؑ جِيۡ.
سَائِلُ خُدَا جو آهِيۡن، ۽ تَابِعُ رَسُولَؐ جوۡ،
ڪِئوۡ ڪوۡ نَه جَزَعۡ و فَزَعۡ، جَمَاعِتَ حُسَيۡنَؑ جِيۡ.

 

غَزَلُ نَمبَرُ 4

”صِفَاتِ خُدَا و رَسُولِؐ خُدَا“

خُدَا جِيۡ صِفَتَ ۽ ثَنَا ٿِيۡ رَهِيۡ آهِ، مُحمَّدَؐ تيۡ صَلِّ عَليٰ ٿِيۡ رَهِيۡ آهِ،
خُدَا لَاءِ تَعَرِيۡفَ توۡصيۡفَ هَرۡ دَمُ، عَرۡش و فَرۡشَ تيۡ جَا بَجَا ٿِيۡ رَهيۡ آهِ.
خُدَا جيۡ ثَنَا کَان سَوَاءِ ٻِيۡ ثَنَا سَڀِ، نَبي ؐ پَاڪَ وَٽِ نَاروَا ٿِيۡ رَهِيۡ آهِ،
سَدَا حَمۡدُاللهَ جوۡ ٿوۡ جُڳَائيۡ، ٻِيَا حَمۡدَ جوۡر و جَفَا ٿِيۡ رَهِيۡ آهِ.
نَبِيۡءَ ؐ تيۡ صَلَوٰتُونۡ هَزَارِيۡن چَوَنِ، اِهَا موۡمِنَنِ لَئه شَفَا ٿِيۡ رَهِيۡ آهِ،
نَبِيۡ ؐ جِيۡ نَوَازِشَ اَسَانۡتِيۡ سَدَائِيۡن، سَنۡدَمِ دَرۡدَ جِي لَئه دَوَا ٿِيۡ رَهِيۡ آهِ.
خُدَا شَالَ رَاضِيۡ اَسَانۡ تِيۡ هُجيۡ، اِهَا مُنۡهِنۡجِيۡ دِلِ جِيۡ رَضَا ٿِيۡ رَهِيۡ آهِ،
خُدَا جِيۡ رَضَا کَان سوَا ڪُجھ نَه هُئي شَلَ، اِنِهيءَ تيۡ سَنديَمِ اِڪۡتِفَا ٿِيۡ رَهِيۡ آهِ.
سَنۡدَمِ يَارَ ڀَائرَ ۽ مَائِٽَ عَزِيۡزَ، اِنهيءَ لَاءِ هيءَ مُدَعَا ٿِيۡ رَهِيۡ آهِ،
مَرَڻۡ ۽ جِيئَڻ سَڀِ خُدَا لَئِه هُجيۡ، اِهَا صَافۡ دِلِ جِيۡ صَدَا ٿِيۡ رَهِيۡ آهِ.
دُعَا مُنۡهِنۡجِيۡ دَائِمُ خُدَا ڪَرِ قَبُولِ، جَا مُنهِنۡجِيۡ سَدَا مُدَّعَا ٿِيۡ رَهِيۡ آهِ،
زِبَانۡ پَاڪَ ٿِيۡ تُنۡهِنۡجيۡ نَاليۡ پَاڪَ سَانۡ، اِهَا آخِرِيۡن اِلۡتِجَا ٿِيۡ رَهِيۡ آهِ.
زَمَانيۡ جِيۡ حَالَتِ دِگَرِ گُونۡ آهيۡ، جَهَانۡ ۾ بَپَا ڪَرۡ بَلَا ٿِيۡ رَهِيۡ آهِ،
حُڪُومَتَ کيۡ آهيۡ اَجَايوۡ جُنُونُ، رَعِيَّتَ تيۡ رُشوَتَ رَوَا ٿِيۡ رهيۡ آهِ.

 

سَدَا صَافُ سَائِلَ کيۡ ثَابِتُ قَدَمُ رَکُه،
عُمۡرِ جِيۡ سَنۡدِيَمِ اِنۡتِهَا ٿِيۡ رَهِيۡ آهِ.

 

غَزَلُ نَمبَرُ 5

پَيدَا ڪَرۡ

خُدَا جيۡ حَمۡدَ ۽ تَعۡرِيۡفَ جوۡ، تَڪۡرَارُ پَيۡدَا ڪَرۡ،
مُحمَّدَؐ مِيۡرَ لَئِه مَنَ ۾ مِٺوۡ، مَعۡيَارُ پَيدَا ڪَرۡ.
پُڃَاڻَانۡ حَمۡدَ ۽ صَلۡوٰتَ، خِدۡمَتَ قوۡمَ جِيۡ گهُرجيۡ،
فِدَاءِ قوۡمَ ٿِيۡ ۽ جَزۡبَئِه، اِيۡثَارُ پَيدَا ڪَرۡ.
ڪَنۡدوۡ جوۡ قوۡمَ جِيۡ خِدۡمَتَ، اُهوۡ مَخۡدُومُ ٿِيۡ وينۡدوۡ،
بِنَا خِدۡمَتَ جيۡ مَخدُومِيۡ مِلَڻ، دُشۡوَارُ، پَيدَا ڪَرۡ.
خُدَا کَانۡ گهُر دُعَا توۡفِيقَ، جِيۡ طَاقَتَ اِطَاعَتَ جِيۡ،
اَسَانۡجيۡ دِلِ ۾ خِدۡمَتِ قوۡمَ جوۡ، اِشۡعَارُ پَيۡدَا ڪَرۡ.
نَبِيءَؐ پَنۡهِنۡجيۡ جِيۡ اُمَّتَ جُونۡ، سَقِيۡمِيۡ حَالَتُون سَمۡجهِيۡ،
رَهِيۡ اَڄُ قوۡمَ جَا بيۡ يَارُ، تَنۡهِنۡجوۡ يَارُ پَيدَا ڪَرۡ.
مُسۡلِمَانَنۡ جِيۡ حَالتِ ڏِسُ، تَه ڪَهۡڙَا غَمۡزَدَه آهنِ،
اُنِهَنِ جيۡ غَمۡزَدَهَ دِلِ جوۡ، هَاڻيۡ دِلۡدَارُ پَيۡدَا ڪَر.
خُدَايَا خَلۡقَ تَنۡهِنۡجِيءَ جَا، سَچَا خَادمَ فَقۡطِ ڪيۡ ڪيۡ،
عَرَضُ آهيۡ خَلۡقَ جَا خَاصَ، خِدۡمَتۡگَارَ پَيدَا ڪَرۡ.
سَڀَئِيۡ مَعۡلُومُ توۡکيۡ آهِ، دُشۡمَنَ دِيۡنَ ڇَا ٿَا ڪَن،
اُنِهيئي دِيۡنَ جوۡ هَاڻيۡ، عَلَمۡبَرۡدَارُ پَيدَا ڪَرۡ.
ڏِسوۡ مَالِڪَ ڏِسوۡ موۡليٰ، سَندَءِ سَڀۡ خَلۡقَ حَيۡرَانَ آهِ،
اُنِهيءَ حَيۡرَان دِلِ غَمۡگِيۡنَ جوۡ، غَمۡخَوارُ پَيدَا ڪَرۡ.

 

غَزَلُ نَمبَرُ 6

”ڀَليۡ آيَا“

ڀَليۡ آيَا رَسُولِؐ اللهِ ڪَعۡبيۡ، پَاڪَ جَا پَانۡڌِيۡ،
اَوَهانۡجي مَرۡحَبَا جيۡ لاءِ هِتِ ٿِيۡ، قوۡمَ هيۡڪَانۡدِيۡ.
اَوَهانۡجِيۡ شَانَ اِسۡتَقِبَالَ لَئِه، آيا هِتيۡ آهِيُون،
اَوهَانۡ جيۡ مُنۡهَنۡ ڏِسَڻ خَاَطِر مِلَڻَ، لَئِه خَلۡقَ هُئِيۡ مَانۡدِيۡ.
اَوَهانۡ آيَئوۡ ڀَلاريۡ مُلۡڪَ، مَانۡ بِهۡتَرۡ ڀَلَارَا ٿِيۡ،
سَفَرُ اَهِنۡجوۡ سَجايوۡ ٿِيوۡ، سَجايوۡسُونُ ۽ چَانۡدِيۡ.
گُنَاهَنِ ۽ خَطَائُنِ کَانۡ، اَوِهِيۡن آزادُ ٿِيۡ آيَئوۡ،
اَسَانۡ بَدۡڪَارِيۡن پَنۡهِنۡجِنِ ۾، آهِيُونۡ هِتِ پِئَا بَانۡدِيۡ.
خُدَا جيۡ ڪَمَ ڪَنَا پَاسيۡ گُنَاهَنِ ۾ عُمۡرِ گُذۡرِيۡ،
خَطَائُنِ جيۡ خَيَالَنِ ۾ نَه، وِکَه هِڪۡڙِيۡ رَهِيۡ وَاندِيۡ.
اوَهَانۡ جِيۡ اَڄُ دُعَا مَقۡبُولُ، ٿِيۡندِي پَاڪَ موۡليٰ وَٽِ،
اَسَانۡ اَڄُ تَنۡهِنۡ ڪَريۡ آنوَٽ، اِجھَا هيءَ اِسۡتِدِعَا آنۡدِيۡ.
سَدَا اِيۡمَان سَانۡ ٿئيۡ، خَاتِمُون اِسۡلَام وَارَنِ جوۡ،
وَفَا تيءَ وَقۡتِ سَڀۡنِيۡ جوۡ، سَڄَڻُ هُئي شَالَ سيۡرَانۡدِيۡ.
خُدَايَا بَيۡتِ اَطَهَرَ ۾ سدا، سَاڪِنُ هُجيۡ سَائِلُ،
مُئيۡ کَانۡ پوءِ مُيَّسَرُ ٿِئيۡ، نَبيءَ جِيۡ پَاڪَ پيۡرَانۡدِيۡ.
                                                                (آمين)

 

غَزَلُ نَمبَرُ 7

”ڀَليۡ آيَا“

ڀَليۡ آيَا رَسُولِؐ الله جَا، پَانۡڌِيۡ ڀَلِي آيَا،
اَوَهانۡ لَئِه ٿِيۡ هِتيۡ هِيءَ، خَلۡقَ هيۡڪَانۡدِيۡ ڀَليۡ آيَا.
خُدَا قِسۡمَتَ ڪئي اَهَنۡجِيۡ، ڀَلَاريۡ مُلۡڪَ اَطَهَرَ ڏيۡ،
جِتَانۡ الله جِيۡ اُلۡفَتَ اَوَهَانۡ، آندِيۡ ڀَلِيۡ آيا.
اَوَهانۡ جيۡ مَرۡحَبَا خَاطَرِ اَسَانۡ هِتِ گَڏُ ٿِيَا آهِيُون،
جُدَائِيءَ ۾ اَوَهانۡجيۡ دِلِ، رَهِيۡ مَانۡدِيۡ ڀَلي آيا.
ڀَلَاريۡ بيۡتِ اَطَهَرَ ڏيۡ، ڪَئي قِسۡمَتَ خُدَا اَهِنۡجِيۡ،
جَنۡهِينۡجيۡ سِڪَ ۾ هِيءَ اُمَّت، رَهيۡ مَاندِيۡ ڀَلي آيا.
اڳِيَان ڪَعبيۡ مُبَارَڪ جيۡ، اڳِيَانۡ روضيۡ مُنّوَر جيۡ،
وڏا رتبا مليا آنکي، پَسي هَادِي ڀلي آيا.
صَفَا، مَرۡوه، مِنَا، عَرۡفَات، مُزۡدِلۡفَه، ٻِيُونۡ جَايُونۡ،
دُعَا کَانۡ هِڪ گهَڙِي اَهِنۡجِيۡ، نَه هُئي وَانۡدِي ڀَلي آيا.
ڀَلَارِيۡ مُلۡڪَ ڏيۡ اَهَنۡجِيۡ، ڪَئِيۡ قِسۡمَتَ خُدَا تَعاليٰ،
جَنۡهِيۡن سِڪَ ۾ سَڄِيۡ اُمَّت، رَهيۡ مَانۡدِيۡ ڀَلي آيا.
سَجَايوۡ ٿِيوۡ سَفَرُ اَهَنۡجوۡ، سَجَايوۡ ٿِيوۡ ثَمَرُ اَهَنۡجوۡ،
سَجآيو ٿِيوۡ اَوَهانۡجوۡ، سوۡن ۽ چَانۡدِيۡ ڀَلي آيا.
ڪَريۡ مَقۡبوُلُ شَلَ اَهَنۡجوۡ، زِيَارَتَ جوۡ سَفَرُ موۡليٰ،
اِهوۡ تُحفوۡ اَسَانۡ آن لَئِه، دُعَا آنۡدِيۡ ڀَلي آيا.
اَوَهانۡتيۡ لُطۡفُ ڪِئوۡ موۡليٰ، اَسَانۡتيۡ مَنَ ٿيئي ڪَڏَهِيۡن،
عَطَا ٿيۡ شَالَ پيۡغَمَّبرَؐ جِيۡ، پيۡرَانۡدِيۡ ڀَلي آيا.
اِلٰهِيۡ دِيۡنَ ۽ اِسۡلَامَ کيۡ، دَائِمُ دَوَامِيۡ ڏيۡ،
سَڄيۡ هيءَ قوۡمَ مُسۡلِمَ ڪَرۡ، تُونۡ هيۡڪَانۡدِيۡ ڀَلي آيا.
عَرَضُ سَائِلَ جوۡ هِيۡ آهيۡ، ته مُسۡلِمَ قوۡمَ دَائِمُ هُئيۡ،
فَنَا ٿئي مُلۡڪَ مَانۡ هِيۡ، شَالَ ڪِيۡ گَانۡڌِيۡ ڀَلي آيا.

 

غَزَلُ نَمبَرُ 8

”اِسۡلَامُ آهۡ“

بَاغِ دُنۡيَا ۾ بَهَارِ بيۡ، خِزَانۡ اِسۡلَامُ آهِ،
جيۡڪوۡ اُنَ ۾ آئِيوۡ، اُنَ لَئِه سَدَا آرَامُ آهِ.
بَاغَ اِنَ جِيۡ بَاغۡبَانِيۡ، پئي ڪَئِيۡ پَيۡغَمَّبَرنِؐ،
مُرۡسَلَنِؐ پئي جَانِ پَهِنۡجيءَ جوۡ، پِيَارِيوۡ جَامۡ آهِ.
خُونُ پَنۡهِنۡجيۡ خَادِمَنِ جوۡ، اُنَجيۡ خَاطِر هَارِيوۡ،
جَنۡهِنۡ سَبَبۡ هِنَ جوۡ شَجَرُ، شَادَابُ صُبۡح و شَامَ آهِ.
مُرۡسَلَنِؐ کَانۡ پوءِ بِه هِنَجِيۡ، بَاغِبَانِيۡ جَنِ ڪَئِيۡ،
تَنِ وَفَا اللهَ سَانۡ پَنۡهِنۡجوۡ، ڪَيوۡ اَنۡجَامُ آهِ.
ابُوبَڪۡرَؓ، فَارُوقَؓ ڪِئوۡ، عُثمَانؓ ڪِئو حَيۡدَرۡؑ ڪيوۡ،
حَسۡنَيۡنِؑ ڪِئوۡ ۽ جَنِ بِه ڪِئوۡ، تَنۡجوۡ وَڏوۡ اِڪۡرامۡ آهِ.
جَنِ رِيَاضَتَ ڪَئِيۡ، رَسُولِؐ اللهِ جِيۡ ڳوۡلي رَضَا،
تَنِ مَٿَانۡ الله جوۡ اَحسَانُ، ۽ اِنۡعَامُ آهِ.
جوۡ بِه ٿِئوۡ اُنَ جوۡ مُخَالِفُ، سوۡ سَدَا نَاڪَامُ ٿِئوۡ،
سي وِيَا سَڀۡ پَاڻ مِٽِجِيۡ، نَانءَ سَنۡدُنِ گُمۡنَامۡ آهِ.
جَنِ بِه خَواهِش ڪَئِيۡ تَه هِيۡ، سَرۡسَبۡزُ ۽ سَائوۡ نَه ٿئي،
تَنۡجيۡ لَئِه ثَابِتۡ ٿِيوۡ هِيۡ تَنۡجِيۡ، خَواهِشَ خَامُ آهِ.
جَنۡهِنۡ بِه هِنَجيۡ بَاغِبَانۡ سَان، بيۡوَفَائِيۡ ڪَئِيۡ ڪَڏَهٍ،
تَنۡهِنۡجِيۡ هيءَ سَارِيۡ حَيَاتِيۡ، هِتِ ۽ هُتِ نَاڪَامُ آهِ.
تُون بِه سَائِلَ جيۡ سَدَا خِدۡمَتَ، ڪَرِيۡن هِنَ بَاغَ جِيۡ،
تُنۡهِنۡجوۡ نَالوۡ ٿئي بلَنۡدُ توۡتِيۡ، هِيۡنئَرَ بَدۡنَامُ آهِ.

 

غَزلُ نَمبَرُ 9

”پَڇۡتَاءُ ڪَرَڻُ“

عَمَلُ جَڏَهِيۡن اَسَانۡجو هوۡ، صَحِيۡفئهِ آسۡمَانِيۡءَ تيۡ،
تَڏَهٍ فَائِزَ اَسِيۡن هُوَاسُون، هَميۡشَه حُڪُمِرَانِيءَ تيۡ.
اَسَانۡجيۡ رَهۡبَرِيءَ جيۡ لَاءِ، هوۡ ڪَافِيۡ ڪَلَامُ اللهِ،
نَبِيۡؐ جيۡ حُڪُمِ حِڪۡمَتَ سَانۡ، قَدَمُ هوۡ ڪَامِرَانِيۡءَ تيۡ.
تَوَڪَّلۡ هوۡ اَسَانۡجوۡ بَسِ، فَقَطِ اَللهَ اَڪۡبَرَ تيۡ،
نَه هوۡسُونۡ ڀَرۡوَسوۡ بِلۡڪُلۡ، ڪَرَامَتَ ڪَشۡفَ ڪَانِيءَ تيۡ.
اَسَانۡ اَڄُ مُسۡتَقِلۡ نَاهِيُونۡ نَمُونۡ ٿَا ٿوۡريۡ لَالَچ تيۡ،
هِيۡنئَر حَقَ کيۡ لِڪَايُونۡ ٿَا، مُلَانۡ جِيئَن مُفۡتُ مَانيءَ تيۡ.
عَدَالَتَ ڪوۡرَٽِنِ مَانۡ ۽، قَضَا قَاضِنِ مَنۡجھَانۡ ويۡئِيۡ،
مِلِيۡ رُشۡوَتَ تَه سَڀُ ڪُجھُ ٿِئوۡ، رَسۡيَاسُونۡ شَادِمَانِيءَ تيۡ.
ڏِسوۡ پيۡرُو، سَڏَائيۡ پَاڻ، کيۡ پيۡرُو مُحمَّدَصه ٿوۡ،
مَگَرِ اُنَ جَا عَمَلَ اَڄُ دَاغَ، آهِنِ مُسۡلِمَانِيۡءَ تيۡ.
اَگَرِ سَائِل سَچوۡ ٿِيۡ اَڄُ بِه، تَائِبُ ٿِيۡن ڪَريۡ توۡبَہَ،
تَه آخَرِ تُونۡ لَهيۡن رُتۡبَا، مَٿَاهَانۡ دَارِ فَانِيءَ تيۡ.

 

غَزَلُ نَمبَرُ 10

”حَاجِنِ سَانۡ موۡڪِلَاڻِيۡ ۽ دُعَا“

سَڀَئِيۡ پَرَ تَؤ خُدَا کيۡ اَيۡ، رَسُولِؐ اللهِ جَا پَانۡڌِيۡ،
اوَهَانۡ کَانۡ موۡڪِلَائِڻ لَئِه، اَڄُ ٿِيۡ قوۡمَ هيۡڪَانۡدِيۡ.
خُدَا حَافِظُ اَوَهانۡ جوۡ شَلَ، هُجيۡ هَرۡ وَقۡتَ ۾ هَرۡ دَمُ،
اَسَانۡ آنوٽِ اِهوۡ تُحۡفُو کَڻِيۡ، آهيۡ دُعَا آنۡدِيۡ.
ڀَلاري طَرۡفِ اَڄُ اَهنۡجِيۡ، ڪَئِيۡ قِسۡمَتَ خُدَا آهيۡ،
جَنۡهِينۡجيۡ سِڪَ مُحبَّت ۾ سَڄِيۡ، اُمَّتَ رَهيۡ مَانۡدِيۡ.
سَويۡن مُشتَاقَ مُحبَّتَ ۾، پَتَنّگَنِ جِيئَن ٿِيَنِ قُرۡبَانۡ،
هَزَاريۡن جَانِ ڪَنِ صَدۡقوۡ، ڪِروۡڙِينۡ سوۡنُ ۽ چَانۡدِيۡ.
جَڏَهٍ پَهُچو وَڃِيۡ ڪَعۡبَيۡ اَڳۡيَانۡ، يَا سَبۡزُ گُنّبَذَ وَٽِ،
تَڏَهٍ چَئۡجوۡ ته يَا موۡليٰ اَسَانۡ، هِيءَ اِلۡتِجَا آنۡدِيۡ.
غَرَضُ! هَرۡ ڪَنۡهِنۡ مُبَارڪۡ مُلۡڪَ ۾، هَرۡ ڪَنۡهِنۡ مُبَارَڪۡ هَنڌ،
اَسَانۡجيۡ لَئِه دُعَا کان ڪَا، گهَڙِيۡ وِهۡجوۡ نَه ائِيۡن وَانۡدِيۡ.
رَسُولِؐ اللهِ جيۡ روۡضيۡ مُطَهَّرَ وَٽۡ، صَلَوٰتُونۡ چَئِيۡ،
اَسَانۡ جيۡ سَوَ سَلَاماً پوۡءِ، خُدَا کَانۡ گهُرجو آزَادِيۡ.
اِلٰهِيۡ ديۡنَ ۽ اِسۡلامَ کيۡ، دَائِمُ تَرَّقِيۡ ڏيۡ،
سَڄِيۡ هِيءَ قومَ مُسۡلِمَ ڪَرۡ، وَرِيۡ هِڪَ جَاءِ هيۡڪَانۡدِيۡ.
اَسَانۡ ظَالِمَ حُڪُومَتَ جيۡ، اَڳِيَانۡ قَيۡدِنِ مِثۡلِ آهِيُونۡ،
ڇَڏَائيۡ اُنَجيۡ ظُلۡمَن کَانۡ، بَچَائِجَ بَنَّدَ کَانۡ بَانۡدِيۡ.
سَڌُونۡ سَائِلَ جونۡ سَڀ، پُورِيُون ٿِيوُن، هِڪڙي اڃَان آهيۡ،
عَطَا ڪَرۡ تُونۡ عِنَايَتَ سَانۡ، نَبِيءَؐ پَنۡهِنۡجيۡ جِيۡ پيۡرَاندِيۡ.

 

غَزَلُ نَمبَرُ 11

”گُذَشِتَه جِيۡ يَادِ“

عِلۡمَ ۽ هُنۡرَ ۾ هِنَ کَانۡ اڳيۡ، هَرۡ فَرۡدُ ڪَامِلُ هوۡ،
تَوانَائِيۡ ۽ هِمَّتَ ۾ خُدَا، جوۡ فَضلُ شَامِلُ هوۡ.
اَڳيۡ دَرۡيَاهَ قوۡمِيۡءَ ۾ صَدَفۡ،، سينو اَسَانۡ جوۡ هوۡ،
لَبَالَبِ گوۡهَرِ مَقۡصُودَ، سَانۡ دَامَانِ سَاحِلُ هو.
زَمآنُونۡ مُعۡتَرۡفُ هوۡ شَانَ، شوۡڪَتَ ۽ شُجَاعِتَ جوۡ،
بَهآدُرَ مُلۡڪَ ۾ هُوَاسُون، اَسَانۡ ۾ ڪوۡ نَه بيۡدِلِ هوۡ.
ڪُشَادَه دِلِ هُوَاسُون، پَنۡهِنۡجِيۡ شيوَهۡ خُلۡقَ و مَرۡوَتَ ۾،
نِشَانِ سُورَهِ اِخۡلَاصَ، گَرۡدَنِ ۾ حَمَائِلُ هوۡ.
اَسَانۡجيۡ آهِنِيۡ چَنبّيۡ ڪَيوۡ، ٿِيۡ چُورُ دُشمَنَ کيۡ،
کَڻِيۡ فوۡلَادَ بَازُو جيۡ، ڪَڏَهٍ مَدِّ مُقَابِلُ هوۡ.
نَبِيءَؐ جيۡ عِشقَ کَان دِلِ کيۡ، مِلۡيوۡ دَرَسِ حُرِيَّتَ هو،
نَه هوۡ غَمُ قَيۡدَ جوۡ دِلِ ۾، نَه ڪوۡ خوۡفِ سَلَاسِلَ هوۡ.
عَمَلُ قُرۡآنَ تيۡ هوۡسُون، سَڄيۡ دُنِيَا مُسَخَّرَ هُئِيۡ،
مُحمَّدؐ جِيۡ اِطَاعَتَ هُئِيۡ، تَه سَڀُ ڪُجھۡ فوۡقُ حَاصِلُ هوۡ.
اُهَا تَعۡلِيۡمَ هُئِيۡ جَنۡهِن کَانۡ، اَسَانۡ جوۡ اوجُ هوۡ اَعۡليٰ،
اُهَا تَعۡلِيۡمَ هُئِيۡ جَنۡهِن کَانۡ، اَسَانۡ جو دِين ڪَامِل هوۡ.
اُهَا تَعۡلِيۡمَ هُئِيۡ جَنۡهِن کَانۡ، شَهَنِشَاهِيۡ اَسَانۡجِيۡ هُئيۡ،
انهيءَ تعليم ۽ تهذيب تي، هَرۡ فَرۡدُ عَامِلُ هوۡ.
اُهَا تَعۡلِيۡمَ هُئِيۡ جَنۡهِن کَانۡ، اَسَانۡوَٽِ عَدُلُ اَهۡڙوۡ هوۡ،
جوۡ هَرۡ هِڪُ حَاڪۡمُ و مَحَڪُومُ، عَالِمُ هوۡ ۽ عَادِلُ هوۡ.
ڪَرۡيُونۡ اللهُ اَڪۡبَرُ مَسۡجِدِنِ، ۾ پَنۡجِگَانَه جيۡ،
ڄَمَايُونۡ دِينَ جوۡ ڌَاڪوۡ، اَڳيۡ جيۡڪوۡ ڄَمَايَل هوۡ.
وَٺُوۡن تَعَلِيۡمَ اُوءَ سَاڳِي، ڏِنِيۡ جيۡڪَا نَبِيؐ اَڪۡمَلَ،
تَه وَڻُ اِيۡمَانَ جوۡ ڪَامِلُ، ٿِيئيۡ جيۡڪوۡ سَمَايَلُ هوۡ.
رَکُونۡ جيۡ خوۡفُ خَالِقَ جوۡ، مَڃيُونۡ سَڀَئِيۡ اَمُرَ اُنَ جَا،
تَه سَڀِ فَاضلَ ٿِيئُونۡ اَهۡڙَا، اَڳيۡ جِيئَنۡ هَرۡڪو فَاضلُ هوۡ.
سَچَائِيۡءَ سَانۡ سَخَاوَتَ سَانۡ، مَرۡوَّتَ سَانۡ مِلَاوَتَ سَانۡ،
بَنَايُونۡ مَرۡتَبوۡ اَهۡڙوۡ اَڳيۡ، جيۡڪوۡ بَنَايَلُ هو.
سَچِيءَ سَرۡڪَارِ جَا تَابِعَ، ٿِيُونۡ پير و مُحمَّدَؐ جَا،
تَه سَڀِ تَابِعَ ٿِيئَن پَنۡهِنۡجَا، اڳِيۡ جِيئَنۡ هَرۡڪوۡ قَائِلُ هوۡ.
بَنُونۡ شَيۡدَا مُحَمَّدَؐ جَا، ڪَرۡيُونۡ سِرُ سَاهُ ٻَئِيۡ صَدَقوۡ،
سِڪَايَلَ ٿِيُونۡ سَڀَئِيۡ اُنَ جَا، خُدَا جَنۡهِنۡجوۡ سِڪَايُلَ هوۡ.
ڇَڏيۡ ٻِئَا دَر سَڀَئِيۡ الله، جيۡ دَرَ جَا ٿِيُونۡ سَائِلَ،
ڪَرۡيوُنۡ اُنَکيۡ عَرَض جَنۡهِنۡجوۡ، رَسُولِؐ اللهِ سَائِلُ هوۡ.

 

غَزَلُ نَمبَر 12

ڇوۡ آهيۡ؟

اِسۡمَ اَللهَ ڌَارَانۡ اَڄُ، ٻِيوۡ آوَازُ ڇوۡ آهيۡ؟
سَوَا نَامِ خُدَا تَعۡلِيۡمَ جوۡ، آغَازُ ڇوۡ آهيۡ؟
اَڳيۡ تَعۡلِيۡمَ هُئِيۡ اِسۡلَامَ جيۡ، قَانُونَ جي اَنّدَرِ،
هِينۡئَر اُسۡتَادَ شَاگِرِدَنِ ۾، نَخۡرو نَازُ ڇو آهيۡ؟
اَڳيۡ هوۡ دِيۡنَ خَاطَرِ، مَالُ، سِرُ، ۽ آلُ سَڀۡ صَدۡقوۡ،
هِينۡئَر ڦُرِ مَارِ تيۡ سَڀُ ڪوۡ، ٿِيُو جَانۡبَازۡ ڇوۡ آهيۡ؟
ٺَڳِيۡ، چوۡرِيۡ، دَغَا، دَلبيۡ، رِيَا، رُشۡوَتَ رَسَائِيۡ سَان،
ڪَريۡ گَڏُ مَالَ کيۡ هَرۡ ڪوۡ، ٿِئوۡ مَمۡتَازُ ڇوۡ آهيۡ؟
اَڳيۡ جِنِ خَانِقاهُنِ ۾، ذِڪۡرُ قُرۡآنَ هوۡ جَارِيۡ،
اُتيۡ طَبۡلَنِ طَنۡبوُرَنِ جوۡ، سُرُودُ ۽ سَازُ ڇوۡ آهيۡ؟
هِينئَر ڏِسُ حَالُ هِيڻَن جوۡ، ٿِيوۡ جھِرِڪِيۡءَ مِثِلِ آهيۡ،
شِڪَارِيءَ مِثِلِ شَاهُوڪَارُ، اُنَ تيۡ بَازُ ڇوۡ آهيۡ؟
سَوَارِيۡ گَڏَه جِيۡ مِسۡڪِيۡنَ، کيۡ نَاهيۡ مُيَّسَرُ اَڄُ،
پَرَائيۡ مَالَ تيۡ حُڪَّامَ، کيۡ پَرۡوَازۡ ڇوۡ آهيۡ؟
هَميۡشَه حَقَّ جوۡ ڪَلۡمُونۡ چَوَڻُ، هوۡ شيوهِ مُسۡلِمَ،
مَگَرِ اَڄُ زوۡرَ وَارَنِ سَانۡ، ٿِيوۡ هَمۡرَازُ ڇوۡ آهيۡ؟
چَونِ ٿَا مُلۡڪُ پَاڪِسۡتَانُ، مُفۡلِسُ ۽ غَرِيۡبُ آهيۡ،
خدا جي نعمتن جِي هِتِ، هُت ٿي چورِي ڇو آهي؟
ڏِسِيۡ هِيۡ حَال پَنۡهِنۡجِيۡ قوۡمَ، جوۡ سَائِلَ پُڇينۡ ڇوۡ ٿوۡ،
اِلٰهِي اَڄُ زَمانيۡ ۾، هَوَا نَاسَازُ ڇوۡ آهيۡ؟

 

غَزَلُ نَمبَرُ 13

”تَلۡقِيۡن و تَرۡدِيۡدَ“

دَرُ ڇَڏيۡ ڏَتَارَ جوۡ، ٻيۡ دَرِ وَڃي ڇوۡ بيۡ عَقُلُ،
هَڻُ هَميۡشَه دَرَ مَٿيۡ الله، جيۡ هَرَ هَرَ هَڪَلَ.
جوۡ اَپَائِيءَ ۾ نِپَائيۡ، سَارَ سَڀَ ڪَنۡهِنۡ جِيۡ لَهيۡ،
عَرۡضَ اوۡنَائِيۡ سَڀِنِ جَا، جوۡ گهُريۡ جيۡڏِيۡ مَهَل.
ٻِيَا سَڀَئِيۡ مُحۡتَاجَ اُنَ جَا، اُنَ جيۡ دَرَ تَانۡ پِئَا پِنَنِ،
تُون گهُرِيۡنۡ ڇوۡ ٿوۡ اُنَهَن کَانۡ، جَنِ کَيۡ تُنۡهِنۡجِيۡ نَاهيۡ ڪَلَ.
ڇوۡ وَڃِيۡ ڪَاهِنَ ڪَنَا ٿوۡ، غَيۡبَ جوۡن خَبَرُونۡ پُڇينۡ،
نَاهِ موۡليٰ پَاڪ جيۡ ڪَمَ ۾، ڪَنۡهِيۡنۡ کيۡ ڪو دِخۡلُ.
جوۡ گهُريۡ سوۡ ٿوۡ ڪَريۡ ٻيۡ، کيۡ نَه اِنَ ۾ اَخِتِيَارُ،
سَڀۡ اَٿَئِيۡ بيۡڪَارُ ٻِئَا، ڦِيۡڻَان، سَڳَا، تَعۡوِيۡذَ، ڦُلَ.
عِلۡمُ سَڀۡ الله کيۡ جيۡڪِيۡ، ڪَنۡديۡن سوۡ پِئوۡ ڏِسيۡ،
ٻِيَا رَکِيَاءٍ توۡ مَٿَان چَالَاڪَ، چَارِيۡ، ۽ چُغۡلَ.
نَفۡسُ ۽ شَيۡطَانُ ٻَئيۡ ويۡريِۡ، سَنۡدَءِ سَڀَ کَانۡ وَڏَا،
جيۡ مُنجھَائِيۡندا ڏَسِيۡندَا پِئَا، سَڀَئِيۡ بُڇۡڙَا شُغۡلَ.
ڪَرۡ سَجَايوۡ مَالُ دوۡلَتَ ۽، عُمِرِ پَنهِنۡجِيۡ عَزِيۡزَ،
ڄَاڻُ قَاصِدُ موۡتَ جوۡ، ڪَنۡهِنۡ وَقۡتِ چَوندُءِ هَاڻِيۡ هَلُ.
پوءِ تُونۡ حَسۡرَتَ سَاڻ ڏِسَنۡديۡن، دِلِ ۾ چَوَنۡديۡن هاءِ هَاءِ،
هِيۡ سَڀَئيۡ سَامَانَ بَنگُلَا مَالَ، مَاڙيُونۡ رَنگِ مَحَلَ.
جيۡ مِليۡ مُهۡلَتَ تَه سَڀِ، صَدَقوۡ ڪَرۡيَانۡ صَالِحُ ٿِيَان،
پَرَ اَجَلُ ٽَرَنۡدوۡ نَه هِڪَ، سَاعِتَ ۽ چَوَندُءِ وَئيۡ مَهَلَ.
جوۡ رَکيُئهِ سوۡ ٿِئوۡ پَرَائوۡ جوۡ، ڏِنُئِه سوۡ ٿِئوۡ سَنۡدُءِ،
جوۡ ڪَيُئِه گَڏ سوۡ وِڃَايُئهِ، جوۡ ڏِنُئِه سوۡ ٿِيُئِه رَکِئَلۡ.
تَنۡهِنۡ ڪَريۡ هِنَ وَقۡتَ کيۡ، ڄَاڻِيۡ غَنِيۡمَتَ ڪَرۡ عَملُ،
جوۡ اَٿَئِيۡ ڏِئَڻُونۡ تَه ڏيۡ، جوۡ اُتِ وَرِيۡ مَلَنۡدُءِ اَٽَلُ.
نَه تَه اَدَا آخِر اِهيۡ اَسۡبَابَ، ويۡندَءِ ٻِئَا کَڻِيۡ،
بَاغَ بَنۡگَلآ سَازۡ و ساَماَن خَانِقَاهُونۡ اِصۡطَبَلَ.
هيۡڪَلوۡ هَلَنۡديۡن هِتَانۡ، خَالِيۡ هَٿيۡن مَيۡدَان ۾،
ڪَا رَفَاقَتَ ڪَانَه هُونۡدِيۡ، بَسۡ سَنۡدَءِ هُونۡدَا عَمَل.
۽ عَمَلَ تُرَنۡدَا ۽ ٿِيۡندِي، ڀيۡٽِ ڀيۡٽَانۡ بيۡ رِيَا،
اُتِ ڪَنۡهِيۡن کيۡ ڪَا نَه ڪَا، اِيۡندِيۡ مَٿَانۡ ڪَنۡهِنۡکيۡ ڪَهَلَ.
هِيۡ سَڀَئِيۡ عُضۡوَا سَنۡدَءِ، شَاهِدَ مَٿَهِنۡ ٿِينۡدَا اُتيۡ،
اُتِ چَڱَنِ عَمَلَنِ بِنَا ٻِيۡ، ڪَمِ نَه اِيۡندِيۡ ڪَابِه ٽَل.
اُتِ ڪَنۡديۡن ڪِيئَن جِتِ ڪَنۡدو، فَرۡيَادۡ پَيۡغَمَّبَرُؐ ڪَرِيۡمُ،
يَااِلٰهِيۡ قوۡمَ هِنَ قُرۡآنَ، جوۡ ڇَڏيوۡ عَمَلُ.
شَاهِ دُنۡيَا جيۡ دَرَنَ تيۡ، دَائِمَا دَرۡبَانۡ رَهَنۡ،
پَرَ خُدَا دَيَّانَ جِيۡ دَرۡبَارِ، ۾ ڪَنۡهِنۡ کيۡ نَه جَهلَ.
ڪَرۡ خُدَا لڳ خَيۡرَ صَدۡقَا، نَه تَه کَڻِيۡ وينۡدَءِ ٻِئَا،
۽ ڪَنۡدَا مِلۡڪِيَتَ مَٿيۡ، وَارِثَ سَنۡدَءِ جھيۡڙَا خَلَل.
نيۡٺِ وَارثۡ سَڀَ جوۡ اُو، وَالِيۡ وَلِيۡ وَارِثُ خُدَا،
تَنهِنۡڪَريۡ سَائِلَ سَدَا، دَيَّانَ سَانۡ ڳَنۡڍِ پَنۡهِنۡجِيۡ دِلِ.

 

غَزَلُ نَمبَرُ 14

”تَلۡقِيۡنَ وَحَدَانِيَتَ و رِسَالَتَ“

خُوشِيۡ آهيۡ خُدَا جيۡ لَاءِ، خَائِفُ دِلِ بَنَائِڻَ ۾،
مُحبّت سَاڻُ مُحمَّدؐ  ڏَانۡهَن، مَنُ مَائِلُ بَنَائِڻَ ۾.
رَسُولِؐ اللهِ ڏيۡ رَغۡبَتَ، سَانۡ موۡلَا جِيۡ مُحبَّت آهِ،
اِنِهيءَ جيۡ لَاءِ سَاريۡ، شُغۡلَ جيۡ شَاغِلُ بَنَائِڻَ ۾.
وَمَنۡ يُّطۡعُ فَقَدۡ اَطَاعُ، اللهِ ثَابِتُ ڪِئوۡ،
بَلَنۡدُ ڪِيئن شَانُ اُنَ جوۡ، پَاڻَ سَانۡ شَامِلُ بَنَائِڻَ ۾.
اَطِيۡعُ اللهَ وَرُسلِه اِهوۡ، فَرۡمَانُ فُرۡقَانيِۡ،
فَرَضَ سَڀَئِيۡ ٿِيَا هِيۡ پَاڻَ، کيۡ فَاضۡلُ بَنَائِڻَ ۾.
اِطَاعِتَ ۾ رَهَڻُ وَاجِبُ، سَدَا مومِنَ مَٿَان آهيۡ،
ڪَڏَهٍ ڪَنهِنۡ کيۡ بِه جَائِزۡ نَاهِ، دِلِ ڪَاهِلُ بَنَائِڻَ ۾.
سَدَائِيۡن سُسۡتُ ٿِيۡ سُکَه سَانۡ، سُمَهَڻُ گهُرۡجيۡ نَه مُسۡلِمَ کيۡ،
سَدَا ڪوۡشَانُ رَهۡجيۡ قَلۡبَ، کيۡ قَابِلُ بَنَائِڻَ ۾.
رِيَا، رُشۡوَتَ، ظُلۡمُ، زوۡرِيۡ، جَفَا، جوۡرِيۡ، نَه جَائِزۡ ٿِيۡ،
سَدَا اِنۡصَافَ سَان هَلُ، پَاڻکيۡ عَادِلُ بَنَائِڻَ ۾.
خُدَا جِيۡ حَمد ۽ تَبۡلِيۡغَ، ۽ تَعۡرِيۡفِ پيۡغَمَّبَرَ ؐ،
ٻيوۡ سَڀِ شِعۡر نَاجَائِزُ، مَغَزُ پَاڳَلُ بَنَائِڻَ ۾.
مُونۡ کيۡ آئِيۡ نَه مِصۡرَعَ هِنَ، جِيۡ معۡنيٰ سَمجھَ ۾ اَڄَ تَئينۡ،
مَزوۡ آهيۡ مَہِ نوۡکيۡ، مَہِ ڪَامِلُ بَنَائِڻَ ۾.
سَوَا اَلله اَڪۡبَرَ جيۡ نَه ٻئي، ڪَنۡهِنۡ کيۡ تَه ڪَا قُدۡرَتَ،
تَڏَهٍ فَاسِقُ ٿِيَانۡ ڇوۡ؟ پَاڻ، کيۡ فَاعِلُ بَنَائِڻَ ۾.
خُدَا کَانۡ غيۡر جوۡ سَائِلۡ ٿِيئَڻ، بِلۡڪُل رَوَا نَاهيۡ،
تَڏَهٍ ڪوشَشِ تُونۡ پَنۡهِنۡجِيۡ ڪَرِ، سَنۡدُسِ سَائِلُ بَنَائِڻَ ۾.
 رَسُولِؐ اللهِ جِيۡ رَاءَفَتَ کَپيۡ، جيۡ پيۡرُ و مُحمَّدَؐ ٿيۡ،
مِليۡ رَحۡمَتَ سَنۡدُيَسۡ اُنَ لَاءِ، دِلِ قائِلُ بَنَائِڻَ ۾.
مَہِ نوۡ کيۡ مہ ڪَامِلَ بَنَائِڻَ ۾ مَزوۡ ڪَهۡڙوۡ،
مَزوۡ آهيۡ خُدَا خَاطَرِ، گَليۡ گهَائِلُ بَنَائِڻَ ۾.
اَدَبَ جِيۡ اَنجّمَن وَارَن، کيۡ مُنۡهِنۡجوۡ هِيۡ عَرَضُ آهيۡ،
خُدَا جيۡ بَنّدَگيءَ رِيَءَ جُھدُ سَڀِ جَاهِلُ بَنَائِڻَ ۾.
عِلۡمُ آهيۡ ڪَلَامُ اللهِ، رَسُولِؐ اللهِ جِيۡ سُنّتَ،
عِلۡمُ بِهۡتَرۡ اُنَهَنِ جيۡ حُڪُمَ، تيۡ عَامِلَ بَنَائِڻَ ۾.
سَوَا توۡفِيۡقَ تُنۡهِنۡجي يَاخُدَا، ڪَهۡڙوۡ عَمَلُ ٿِينۡدو،
تَڏَهٍ ٿِئوۡ عَرَضۡ سَائِلَ جوۡ، سَدَا سَائِلَ بَنَائِڻَ ۾.

 

غَزَلَ نَمبَرُ 15

”غَنِيۡ يَا غَرِيۡبُ“

گهُريۡ جيۡڪو توۡکَان غَنِيۡ يَا غَرِيۡبُ، تَه اُن لَاءِ آهِيۡن قَرِيۡبُ مُجِيۡبُ،
ڇَڏيۡ تُنۡهِنۡجوۡ دَرۡ، جوۡ ٻِئَنِ وَٽِ وَڃيۡ، اُهوۡ آهِ بيۡشَڪِ وَڏو بيۡ نَصِيۡبُ.
پُڇۡيو تُنهِنۡجِيۡ ٻَانهِيۡن ته آهيِنۡ ڪِٿي، چيوۡ توۡ اُنِهيءَ کيۡ فَانِّي قَريۡبُ،
جِتيۡ جوۡئِيۡ توۡکيۡ عَرَضۡ ٿو ڪَريۡ، تَه فَرۡمَائِيوۡ توۡ نَه آهِيَانۡ اُجِيۡبُ.
اُهيۡ ٿيۡندَا فَائِزُ اُهيۡ مُفۡلِحوۡنَ، اَچَنِ جيۡڪِيۡ توۡ وَٽِ بِقَلۡبٍ مُنِيۡبُ،
سَڀِنِ تيۡ سَدَا تُنۡهِنۡجِيۡ سُهِڻيۡ سَنڀَالَ، مِڙِنِ جيۡ مَٿَانۡ تونۡ حَفِيۡظُ رَقِيۡبُ.
مِڙَئِيۡ تُنۡهِنۡجَا مَخۡلُوقَ جيۡڪِيۡ جِتيۡ، اُنَهن کيۡ بَنايوۡ توۡ آهيۡ عَجِيۡبُ،
سَفَرۡ سَخۡتَ آسَان ڪِجِ يَاالله، اَسَان آهِيُون مُفۡلِسَ ۽ مَنزَل مُهِيۡبُ.
شَفَاعِتَ نَبِيءَؐ جيۡ مَانۡ بَهروۡ مِليۡ، ڏُکۡيوۡ ڏيۡههُ مَحَشَرَ جوۡ يُومِ عَصِيۡبُ،
ڪِجَانۡ موۡمِنَن لَاءِ سَهکوۡ حِسَابُ، تُون آهِيۡن رَحِيۡمُ سَرِيۡعُ حَسِيۡبُ.

 

سَدَا سَائِلَ پيۡر و مُحمَّدَ هُجوُن،

رَهُونۡ زيۡرِ فَرۡمَانۡ مُحمَّدَ حَبِيبۡ.

نئون صفحو --  ڪتاب جو ٽائيٽل صفحو
ٻيا صفحا 1 2 3 4 5 6 7 8 9 10 11 12 13
هوم پيج - - لائبريري ڪئٽلاگ