ميهَرُ نه ميهَرُ،

واتِ نه ساڳي ونجهلي

پَڳَ نه ساڳيو وَرُ.

*

سُهڻي، ترينءَ تار،

تو نه چيو ڪنهن پاتڻيءَ

”پتڻُ پارِ اُڪاِر!“

*

ميهارو ميلا!

وَري چَڙن چُپِ سان

ٻُرن ٿا ٻيلا!

*

ماهِي ڙي ماهي!

آڌيءَ اُٿي مُنڌ کي

سارَ نه ساهي!

*

هي جي لوڪَ سُتي،

لهريون لتاڙيو وڃن

آڌيءَ رات اُتي!

*

گِلا وارو گَسُ. . .

لهريون ليکي ڪينڪي

رهاڻين جو رَسُ –

*

هِن ليءِ ايڏو پنڌُ!

سُهڻيءَ مُنهن ميهار جو

ڏِٺو، کڻِي ڪَنڌُ.

*

ساهَڙ او ساهَڙ!

چانڊوڪيءَ جا چيٽ ۾

وهن ٿا واهَڙ!

*

ٻرنديءَ کي ٻارِين،

ساهڙ منهنجي ساهه ۾

چِڙيون چهڪارِين.

*

مَرُ ته ڪنهن پَر مَرُ!

سُهني وري سير ۾

ڀيليٖ مٿيٖ ڀَرُ!

*

ميهَر اُها مان نه!

ڪڏهن وَرنديس ڪانه

تارَ منجهان طوفانَ!

*

دُکي جا دونهِين،

پرينءَ ڀر درياهه جي

تون اُن جي سونهِين؟

*

چَيو هَڏَ نه ڪَن،

پَکا پنهونءَ پار جا

سسئيءَ سَڏَ نه ڪَن!

*

ڪيڏو ڏورِ ويامِ؟

ڏِٺو پنهونءَ پار ڏي

لَڪُ جهلي مون لامَ!

*

هاڻي ڪنهن کي ڪاڻِ!

آريءَ بنا ٿئي نه ٿئي

وندُرَ ۾ واکاڻ!

*

ڀوڳيان پئي آئُون،

ڪوهيارل توساڻُ جـٖـي

لکئـٖـي جون لائُون.

*

اَجهو ٿي آري!

ڪَهندي آرهڙ اُسَ ۾

ڪَڙهِي ٿيس ڪارِي.

*

اَجهو ٿي آري!

اُف! هي آرهڙ اُسَ ۾

وِندُر جي وارِي!

*

ٻَٻَ مٿان پيرا،

ڍَڪي ڍڪيان ڪيترو

تنهنجا گهگهيرا!

*

سانجهيءَ جي ويرا،

ڪانون ’ڪان‘ ’ڪان‘ پَٻَ تي

ٻانيڻ جا ٻيرا.

*

ڏاگهن منجهه ڏُڦيڙَ،

گس اڙانگها گهيڙَ

رڳو ڇَپَر ڇيڙَ!

*

بَرَ اڳيان باري،

واري ئي وارِي

آرِي او آرِي!!!

*

سارو ڪيچُ ڪُپَت،

پوءِ به اي پورهَيت

وَٺُ نه موٽڻ مَتِ!

*

ڌوڙي ناهه ڌڻي،

۽ تو هِڪَ ڄَڻِي

ڪهڙي ڳالهه ڳڻي؟

*

وِندُر وڪاڻي-

ڪُلهي ڦاٽل ڪنجرو

پوتي پُراڻي.

*

اُٿي آريءَ لاءِ،

لَڪَ جهلي ليلاءِ

پنهنجو پنهون پاءِ!

*

لُنءَ لُنءَ ڪانڊارِي،

اُجهامي وئي آگ، جا

ٻاروچل ٻاري.

*

وَرَ! تون ئي وَڻڪارَ،

وِندُر ساري سُڃَ آ

ڪٿي تون ڪوهيارَ؟

*

موٽ به ڪَهڙي موٽَ،

اُٺن ڪُٺن ڪيريو

مون کي ڏونگَر چوٽَ!

*

ڪانهي هيل قطارَ،

ڀريو ڏونگر چوٽَ تان

ٿڌو ساههُ نِهارُ.

*

موڙَ نه مينديءَ ڏارَ،

سَسُئي سڀ سپنو هيا

اُٺن تي اوٺارَ!

*

اَجھ نه پنهونءَ پيچُ،

هُٻَ نه سا هالارَ ۾

ڪيچُ نه ساڳو ڪيچُ.

*

ڪنهن کي ڏاگهن ڏاههَ؟

وِندُر واهيرا سُتا

سُتي هر وڻراهه.

*

ڪيچَ ڪَرايُون ڇَڏِ!

پنهون ايندو پاڻ ئي

وندرُ وايُون ڇَڏ!

*

ڇا مان موٽان؟ ڇونه!

رُڳو پيرَ پنهونءَ جا

اوهِي پَهِي ڪونه!

*

اَڄُ ڇا اجايون،

ڪُنڪي ڪُنواٽن ڪيون

وندر جون وايون؟

*

هوتَ لنگهيا هاڙهو،

سِجُ انهيءَ ئي مرم ۾

اڃا آ ڳاڙهو.

*

گُوندر! ڪهڙو گَسُ؟

اڄ مون وندُر واٽ جو

وَڻُ نه ڏيَن ڏَسُ!

*

ميلا ڙي ميلا!

اکين سان اوٺي ڏٺا

ساجهُر سَويلا.

*

پَڊ نه پاٿاريون،

نه سي ڪينجهر ڪنڌئين

ڀوريون ڀٽاريون.

*

جهونا ڳڙهه جَنجارُ،

نه تو مَٿو اوپرو

نه مان مڱڻهار!

*

گهوڙن مٿـٖـي گهوٽَ،

ها، پر ڏيههُ ڏياچ جو

چَڙهين ڏئي چوٽ.

*

سُرندا سجايا،

هي جو ڏيهه ڏياچ جو

اُن ۾ اجايا.

*

ڪنهن کي قلعي ڪَرَ؟

ڪوٽ نه پَسجي ڪُنگرو

نه ڪي پکيءَ پَرَ!

*

نه سو رَنڪُ نه راءُ،

ڪوٽ نه پسجي ڪُنگرو

مٿان تَتيءَ تاءُ.

*

(وڌيڪ پڙهو)

نئون صفحو --  ڪتاب جو ٽائيٽل صفحو --گذريل صفحو

ٻيا صفحا 1 2 3 4 5 6 7 8 9 10 11 12 13 14 15 16
هوم پيج -- لائبريري ڪئٽلاگ