|
الا هــمــرچو هوڙي لا...
اُتر ۾ ڪارِين ڪـَـڪرِين هو لا-
(اتر ۾ ڪارا ڪڪر اُڀريا آهن)
الا هــمــرچو هوڙي لا...
تڙ تڙ ٻولي تاڙيو لا-
(تڙ تڙ تي تاڙو پيو ٻولي)
الا هــمــرچو هوڙي لا...
واڍلـِـيا پيا واڪـِـين هو لا-
(ڪڪر پيا آسمان ۾ ڊوڙن)
الا هــمــرچو هوڙي لا...
تـِـتر کـَـرِڙي آڀي ۾ لا-
(تتر کرڙِي آسمان ۾ ظاهر ٿي آهي)
الا هــمــرچو هوڙي لا...
آيو سانوڻ نيڙو هو لا-
(سانوڻ جي مند ويجهي آئي)
الا هــمــرچو هوڙي لا...
ڀرجي آسي برسارو لا-
(ڀرجي ايندو وسڪارو)
الا هــمــرچو هوڙي لا...
جهرِمـِـر بـَـرسي مينهڙلو، ڙي لا-
(جهرمر ڪري مينهن پيو وسي)
الا هــمــرچو هوڙي لا...
رَڙڪـِـي ڀريو رَڙِيارو، ڙي لا(1)-
(مينهن وسي رڙيارو به ڀـَـري ڇڏيو آهي)
الا هــمــرچو هوڙي لا...
وَڙيو ڏکڻ روڪو بائيرو، ڙي لا-
(ڏکڻ جو ڪو واءُ وريو)
الا هــمــرچو هوڙي لا...
سيلهي سٽڪا ڏئي ٿي هولا(2)
-
(کـِـنوڻ به چمڪاٽَ پئي ڪري)
الا هــمــرچو هوڙي لا...
ٻـَـر ٻـَـر ڪري ٿي ٻـَـڪرارِي لا(3)
-
(کنوڻ چمڪاٽ پيئي ڪري)
الا هــمــرچو هوڙي لا...
ڌُڪي ڀريا ڌورا هو لا-
(مينهن وسي ڍورا ڀري ڇڏيا آهن)
الا هــمــرچو هوڙي لا...
ٽـُـڙ ڦـُـڙ ڀريا ٽوڀـَـڙلا، لا-
(ڍنڍون تلاءَ مينهن ڀري ڇڏيا آهن)
الا هــمــرچو هوڙي لا...
پـَـلـُـر پاڻي پـَـٽان تي لا-
(مينهن جو پاڻي پٽن تي پکڙيو آهي)
الا هــمــرچو هوڙي لا...
تـَـل تـَـرائين تار ٿيا لا-
(تليون ترايون سڀ تار ٿيا آهن)
الا هــمــرچو هوڙي لا...
بـَـڙي تان آيو بـَـڙسارو لا-
(وري تان وسڪارو آيو)
الا هــمــرچو هوڙي لا...
گاسِ اُگـِـي ڪـَـريا گهيرا هو لا-
(هر هنڌ گاهه اُڀريا آهن)
الا هــمــرچو هوڙي لا...
کـِـير کـَـٽا ٿيا کاهـُـڙ ۾ لا-
(کاهڙ ۾ کير کٽا جام ٿيا آهن)
الا هــمــرچو هوڙي لا...
ڀـُـرٽ ڀـِـٽان ۾ ڀـِـيچي جو لا-
(ڀٽن ۾ ڀـُـرٽ بيهي ڏس)
الا هــمــرچو هوڙي لا...
(4)
کيتـَـر جوئي ڇڏَ کاهـُـڙَ را لا-
(کاهڙ جون ٻنيون ڏسي ڇڏ)
الا هــمــرچو هوڙي لا...
ليڏاڻا تي لاسان هو لا-
(گـُـڏنِ تي ڇيڙون شروع ٿيون)
الا هــمــرچو هوڙي لا...
کيتـَـر آيا هـَـڪلان ۾ لا-
(ٻنين ۾ جهار هڪلڻ جا ڏينهن آيا)
الا هــمــرچو هوڙي لا...
کانڀانڻيان را سـَـٽڪا هو لا-
(کانڀاڻين جا سٽڪا پيا ٿين)
الا هــمــرچو هوڙي لا...
اُڏين ٿا پکيڙا پوکان تي لا-
(پکيئڙا پوکن تي اُڏامن ٿا)
الا هــمــرچو هوڙي لا...
جهـِـڙڪيـِـن هولا هيڙيا لا-
(جهرڪيون ڳيرا هيڙها پکي آيا)
الا هــمــرچو هوڙي لا...
پائر پـَـچيا آنڀوُڙا لا-
(پائر ۾ آڀـُـون پڪا آهن)
الا هــمــرچو هوڙي لا...
مـُـسڙي کائـِـين ٿا مانٽـِـيڙا لا-
(جـُـوانڙا آڀون مهٽي کائين ٿا)
الا هــمــرچو هوڙي لا...
اُپڙين ٿين ڇوريـِـن آپـَـت ۾ لا-
(ڇوڪريون پاڻ ۾ رانديون ڪن ٿيون)
الا هــمــرچو هوڙي لا...
هـَـنسـِـين ڪـُـڏين ٿـِـين هيڪ جيڏين لا-
(کلن ڪُڏن ٿيون هڪ جيڏيون)
الا هــمــرچو هوڙي لا...
مال مـَـڙهان ۾ ٿو موزان ڪري لا-
(مال مڙهن ۾ موجون ٿو ڪري)
الا هــمــرچو هوڙي لا...
ڇـُـوٽ چـَـريـِـن پيا ڇيلڙا لا-
(اُتي ڇيلا ڇيڪ پيا چرن)
الا هــمــرچو هوڙي لا...
گيهه را ڀـَـريا گاڏا هو لا-
(گيهه جا گاڏا ڀريا آهن)
الا هــمــرچو هوڙي لا...
ٻـَـهل ٻـَـڙهـِـي را ٻاريا پـِـين لا-
(پائر ۾ پـِـسُ پين ٿا)
الا هــمــرچو هوڙي لا...
جهـَـڻ را جـَـنگا جوئي ڇڏ لا-
(لسيءَ جا وڏا وٽا ڏسي ڇڏ)
الا هــمــرچو هوڙي لا...
ڀيچي جو تون بـَـٿاڻان ۾ لا-
(تون بيهي وٿاڻن ۾ ڏس)
الا هــمــرچو هوڙي لا...
کـِـير بـِـڙاهـِـين ٿا کاهڙيا لا-
(کاهڙ وارا کير ورهائين ٿا)
الا هــمــرچو هوڙي لا...
مارو لائـِـين موگر ڙِي لا-
(ماروئڙا لـُـلر ۽ مـَـريڙو آڻين ٿا)
الا هــمــرچو هوڙي لا...
ساڳ رڌين ٿا سانگي هو لا-
(سانگيڙا ساڳ رڌين ٿا)
الا هــمــرچو هوڙي لا...
کوڙ کـُـنڀيان را کاهڙ ۾ لا-
(کاهڙ ۾ کنڀين جا کوڙ ٿيا آهن)
الا هــمــرچو هوڙي لا...
پاساڙان ۾ پـِـپان ڙي لا-
(پاساڙن ۾ پپـُـون ٿيون آهن)
الا هــمــرچو هوڙي لا...
گولاران ۾ گولان ڙي لا-
(گولاڙي ول ۾ گولـُـون ٿيون آهن)
الا هــمــرچو هوڙي لا...
کاٽـُـونبا رِين کوڙِين هو لا-
(کاٽـُـونبن جون کوڙيون ٿيون آهن)
الا هــمــرچو هوڙي لا...
ڏوٿي لاڻين ڏُٿڙو لا-
(ڏوٿي ڏٿ آڻين ٿا)
الا هــمــرچو هوڙي لا...
ڀـُـرٽ ڀلا ٻيجين ٽـُـوسالين لا(1)-
(هڪڙا ڀرٽ ڀلا ۽ ٻيون ٽـُـوهه وليون)
الا هــمــرچو هوڙي لا...
گورا گـَـسان تي ڳاڱيا لا-
(گس تي گوار ۽ ڳاڱا ٿيا آهن)
الا هــمــرچو هوڙي لا...
ڦوڳان ۾ جـَـو، ڦـُـل ٿيا لا-
(ڦوڳن ۾ ڏس ته گل ٿيا آهن)
الا هــمــرچو هوڙي لا...
روهـِـيڙان رِي رونڻـَـڪ جو لا-
(روهيڙن جي رونق ڏس)
الا هــمــرچو هوڙي لا...
گـَـس لـِـڪي گـِـيا گاسان سين لا-
(گاهن سان گس لـِـڪي ويا)
الا هــمــرچو هوڙي لا...
چوکين اُگـِـين چـِـڀڙالـِـن لا-
(چوکيون چڀڙاليون اُڀريون آهن)
الا هــمــرچو هوڙي لا...
گدريـِـن پـَـڪين گسان تي لا-
(گدريون پڪيون گسن تي)
الا هــمــرچو هوڙي لا...
تنهيا ڏيک جائي ڏهران ۾ لا-
(ڏهرن ۾ ميها وڃي ڏس)
الا هــمــرچو هوڙي لا...
ڪاڙينگا ٿيا ٽـِـس لٿي لا-
(ڇانهان ٿيا ۽ اڃ لٿي)
الا هــمــرچو هوڙي لا...
آتا جاتا کائين پيا لا-
(ايندا ويندا کائين پيا)
الا هــمــرچو هوڙي لا...
پيٽ ڀـَـرين ٿا پائـُـر ۾ لا-
(پائر ۾ پيٽ ڀرين ٿا)
الا هــمــرچو هوڙي لا...
ڏيس تان گـِـيو اڄ ڏُکـَـڙو لا-
(اڄ ڏيهه تان ڏک ويو)
الا هــمــرچو هوڙي لا...
کـُـس ٿا ڏيکارجين کاهـُـڙيا لا-
(کاهڙ وارا خوش ڏسجن ٿا)
الا هــمــرچو هوڙي لا...
(5)
وَنڪا وَر ڏي واڪين ٿا لا-
(جوان ور ڏيو ڪوڏاريون هڻن ٿا)
الا هــمــرچو هوڙي لا...
مارڳ جائين ماروڙا لا-
(ماروئڙا گس ڏيو وڃن ٿا)
الا هــمــرچو هوڙي لا...
پاڻي جائـِـين ٿـِـين پاڻـِـهيارين لا-
(پاڻهياريون پاڻي ڀرڻ وڃن ٿيون)
الا هــمــرچو هوڙي لا...
سانگي سنڀريا سـُـوڙهان تي لا-
(سانگيڙا جهنگ وڍڻ لاءِ سنڀريا آهن)
الا هــمــرچو هوڙي لا...
لـُـڙڪـِـين سارين ساريٽـِـي رين لا-
( ”ساريٽي“ ۾ ساريون پڪيون آهن)
الا هــمــرچو هوڙي لا...
لـُـوهان ڏي آيا لايـَـهارا لا-
(لاهيارا لوهون ڏيندا آيا)
الا هــمــرچو هوڙي لا...
لايـَـهاران رين لوڏان جو لا-
(لاهيارن جون لوڏون ڏس)
الا هــمــرچو هوڙي لا...
بـَـهتا آئين ٿا ڀيڙا هو لا-
(سڀئي گڏ هلندا پيا اچن)
الا هــمــرچو هوڙي لا...
ڍنگ ڍاٽيا رو ٻـِـيجو ڪـُـوڻ ڪري لا-
(ڍاٽين جهڙو ڍنگ ٻيو ڪير ڪري)
الا هــمــرچو هوڙي لا...
ڍاٽـِـي ڍٽ سين ڍَڙيا هولا-
(ڍاٽي ڍٽ کان هليا آهن)
الا هــمــرچو هوڙي لا...
مـُـهراڻي رِي مـِـجمانـِـي لا-
(مهراڻي جي مهماني آهي)
الا هــمــرچو هوڙي لا...
آئي چوکان نان آ پـَـڙيا لا-
(اچي چانورن کي رسيا آهن)
الا هــمــرچو هوڙي لا...
چوکا ”چيلاڙي“ (1) را چوکا هولا-
(چانور ’چيلاڙي‘ جا عمدا آهن)
الا هــمــرچو هوڙي لا...
ماڙهـُـوتان ڦـُـٽرا مهراڻي را لا-
(ماڻهو ته سهڻا ”مهراڻي“ جا)
الا هــمــرچو هوڙي لا...
پاڻي تان پڌرو پـَـٻـُـوسر(2) رو
لا-
( ”پٻوسر“ جو پاڻي سٺو آهي)
الا هــمــرچو هوڙي لا...
عـُـمراڻي را تان آنٻا مـِـٺا لا-
(عمرڪوٽ جا ته انب مٺا)
الا هــمــرچو هوڙي لا...
چوکين لـُـگڻـِـين چوٽل(3) رين لا-
(سهڻيون زالون ”چوٽل“ جون)
الا هــمــرچو هوڙي لا...
نارِين نماڻـِـين ننگر رِين لا-
(عورتون نماڻيون ننگرپارڪر جون)
الا هــمــرچو هوڙي لا...
ٻولي تان مـِـٺي ٻٻڙان ري لا-
( ”ٻٻرن“ جي ٻولي مٺي آهي)
الا هــمــرچو هوڙي لا...
ڀـُـونڊا تان ماڻس ”ڀـَـڏيلـِـي“ را لا-
(ڪوجها ماڻهو ”ڀڏيلي“ جا)
الا هــمــرچو هوڙي لا...
گالـِـهين ٿين گائجين گمورِي(1)
رين لا-
(ڳالهيون ٿيون ڳائجن ڳموريءَ جون)
الا هــمــرچو هوڙي لا...
هاڪ گهڻي آهي هاڙهان(2) ري لا-
(هاڪ گهڻي آهي هاڙهن جي)
الا هــمــرچو هوڙي لا...
ڳيجـِـي ماڻس کـِـيرل را لا-
(کيرل ڳوٺ جا ماڻهو لالچي آهن)
الا هــمــرچو هوڙي لا...
ووءِ ووءِ! حال ولهيٽان(3)
رو لا-
(هاءِ هاءِ! حال ولهيٽن جو)
الا هــمــرچو هوڙي لا...
(6)
همرچي رو ويليو ڙي-
هــمــرچو ڙي لا...
ٻيٽان مٿي بـُـگـَـلا ڙي-
هــمــرچو ڙي لا...
اُنڏو گجي گاجـَـڙلو ڙي-
هــمــرچو ڙي لا...
ڏُلـِـيو ڇورو ڏاگان ۾ ڙي-
هــمــرچو ڙي لا...
هـُـڻ تان ڏُليا ڏوڏڪـِـي ڙي-
هــمــرچو ڙي لا...
جهـُـوني گـَـڍَ رو ڪو جوگـِـيڙو ڙي-
هــمــرچو ڙي لا...
ڍيٻي ڍَڙڪـِـين ڍيلڙڪين ڙي-
هــمــرچو ڙي لا...
ڪـِـريو ڙي ڇوريان اَرڙاٽو ڙي-
هــمــرچو ڙي لا...
ڪـَـنٺي جا تان ڪـُـونڀـِـٽـِـيا ڙي-
هــمــرچو ڙي لا...
اڄ تان مـُـنڃـَـرَ سين موريا ڙي-
هــمــرچو ڙي لا...
ڀـَـرِيو تان اوٺاڙي ڙي-
هــمــرچو ڙي لا...
وَڳڙ لو تان هـُـونگاري ڙي-
هــمــرچو ڙي لا...
سارين پـَـڪـِـين ساريٽـِـي ۾ ڙي-
هــمــرچو ڙي لا...
(7)
اُتر ڪيو اوسارو ڙي-
هــمــرچو ڙي لا...
ڍورو ڀـَـريو هيلون ڏي ڙي-
هــمــرچو ڙي لا...
ڍوري جي تان ڪپ تي ڙي-
هــمــرچو ڙي لا...
ڍنڍ تان پـَـڪي سيد جي ڙي-
هــمــرچو ڙي لا...
لاهيارا تان لاڙ جا ڙي-
هــمــرچو ڙي لا...
پوکون پچي تيار ٿيون ڙي-
هــمــرچو ڙي لا...
لـُـڻن ٿيون لاهياريون ڙي-
هــمــرچو ڙي لا...
لـُـڻن ٿيون ٻانهياريون ڙي-
هــمــرچو ڙي لا...
لـُـڻن ٿيون ڪنواريون ڙي-
هــمــرچو ڙي لا...
چـُـني واري لاهياري ڙي-
هــمــرچو ڙي لا...
تائـِـٿن واري طائفو ڪيو ڙي-
هــمــرچو ڙي لا...
مـُـهراڻو هـِـن مـِـيرل جو ڙي-
هــمــرچو ڙي لا...
سائـِـي تان سـِـنڌ سيد جي ڙي-
هــمــرچو ڙي لا...
مڙدن جي تان جوڙي ڙي-
هــمــرچو ڙي لا...
ڪاڇي چـَـروُڙو ڪڇ ۾ ڙي-
هــمــرچو ڙي لا...
سوني تان مـُـنڊيِ هٿ ۾ ڙي-
هــمــرچو ڙي لا...
هنجهه پکي حيراني ڙي-
هــمــرچو ڙي لا...
سوني بـُـولي نڪ ۾ ڙي-
هــمــرچو ڙي لا...
جوڳي آيو جوانڙو ڙي-
هــمــرچو ڙي لا...
(8)
وراڻي: هـَـمـَـرچي جو ويلو ڙي الله.
ڍورو ڙي ڀريو هيلانِ ڏي الله-
هـَـمـَـرچي جو ويلو ڙي الله...
اُتر ۾ گاج گڙوڪي الله-
هــمــرچي جو ويلو ڙي الله...
سائي ڙي پک جو اڄ مورِيڙو الله-
هــمــرچي جو ويلو ڙي الله...
اڇي تان پک رو اڄ ٻاٻيهو الله-
هــمــرچي جو ويلو ڙي الله...
ٽـِـڪسيو کـُـليو اڄ اُمراڻي جو الله-
هــمــرچي جو ويلو ڙي الله...
سيڙهو آيو نيڙو ڙي الله-
هــمــرچي جو ويلو ڙي الله...
ڪـُـونڀـِـٽا موريا هـِـن مـُـهراڻي جا الله-
هــمــرچي جو ويلو ڙي الله...
ساريون پڪيون ”سونپر“ جون الله-
هــمــرچي جو ويلو ڙي الله...
ڪاري پل جو اڄ ڪانگيو الله-
هــمــرچي جو ويلو ڙي الله...
ڪاري تان گاڏي راجا جي الله-
هــمــرچي جو ويلو ڙي الله...
شابي شابي مڙدن جي ٽولي کي الله-
هــمــرچي جو ويلو ڙي الله...
چونئرا ۽ چوڪيون چوٽل جون ڙي الله-
هــمــرچي جو ويلو ڙي الله...
مينهن وٺو ماري جي ملڪ تي الله-
هــمــرچي جو ويلو ڙي الله...
ڪڻڪون پڪيون ڪنڊياري جون الله-
هــمــرچي جو ويلو ڙي الله...
اڄ لاهيارا لڻن ٿا ڙي الله-
هــمــرچي جو ويلو ڙي الله...
(9)
وراڻي: همرچو راڻا، همرچو ڙي الله.
ڪوئل ڪا ٻولي ڙي ٻاغن ۾ الله -
همرچو ڙي الله...
اُونچـِـي ڪا ماڙِي مومل جي الله-
همرچو ڙي الله...
اڇا ڪي پکي ڍنڍ جا الله-
همرچو ڙي الله...
اڇا ڙي ڪپڙا راڻل منهنجي جا الله-
همرچو ڙي الله...
پانڌيئڙو ڪو رهيو ڙي، پنڌ ۾ الله-
همرچو ڙي الله...
چـَـتونڙو ڪو پکي ڙي چينگهاري الله-
همرچو ڙي الله...
ملڪ ڪو وُٺو ڙي مـُـهراڻي جو الله-
همرچو ڙي الله...
مـَـهارون ڙي سارِين مـَـيـَـن جون الله-
همرچو ڙي الله...
سائي ڪا ساڙهي مومل جي الله-
همرچو ڙي الله...
(10)
وراڻي: هـَـملي ڙي همرچو، ڙي الله.
مـِـٺي ٻاروچـِـي ٻولـِـي ڙي الله-
هملي ڙي همرچو، ڙي الله...
جهـَـليو غريبان جهولي ڙي الله-
هملي ڙي همرچو، ڙي الله...
ڪلهي ڦاٽي آهي چولـِـي ڙي الله-
هملي ڙي همرچو، ڙي الله...
سـُـڻو پـُـنهل جي ٻولي ڙي الله-
هملي ڙي همرچو، ڙي الله...
سيري ڀتر جي لولي ڙي الله-
هملي ڙي همرچو، ڙي الله...
کٻي هٿ تي لڳي گولي ڙي الله-
هملي ڙي همرچو، ڙي الله...
مٺي وڄي ٿي مـُـرلي ڙي الله-
هملي ڙي همرچو، ڙي الله...
(ج) واقعاتي همرچو
(11)
همرچو راڻا، همرچو ڙي الله.
لاکو ماراڻو نـُـوري ٿيٻيءَ تان الله-
همرچو ڙي الله...
ڌؤنرو اُٺ ڙي ”لاکي ڀيل“ جو الله-
همرچو ڙي الله...
اڇو اوٽو ڙي ”نوري ٿيٻي“ جو الله-
همرچو ڙي الله...
ڍڳو ڪو ماراڻو ”نوري ٿيٻي“ جو الله-
همرچو ڙي الله...
”نوران“ ڏي ٿي گهـُـوران ڙي الله-
همرچو ڙي الله...
”لاکو“ ماراڻو نوران تي ڙي الله-
همرچو ڙي الله...
|
